單車節愈踩愈有型 名人參賽兼行善

踩單車近年係全城追捧嘅健康運動，今個星期日（14日）舉行嘅第四屆「新鴻基地產香港單車節」，都有唔少CEO同名人報咗名。旅發局姊妹同黛安講，中午舉辦嘅「總裁慈善及名人單車遊」已經有20人報名，包括旅發局總幹事劉鎮漢、新鴻基地產嘅執行董事兼副董事總經理黃植榮、東亞銀行嘅執行董事兼副行政總裁李民斌，同副行政總裁兼營運總監唐漢城都會上陣。

出名鍾意踩單車嘅包浩斯國際控股有限公司執行主席兼行政總裁黃銳林，今年都會參加；女將方面唔少得一田百貨嘅靚靚行政總裁黃思麗啦。而加拿大駐香港及澳門總領事南傑瑞，同莊士機構國際有限公司嘅聯席董事總經理莊家豐，都係首度披甲上陣。

黛安都好期待佢哋最終表現，話晒今次唔止踩足近3公里，各位社會賢達都為慈善出咗一分力㗎；事關佢哋每位1.5萬元嘅報名費，大會全部都會撥晒做慈善，大家星期日記得朝早去尖東梳士巴利道，同佢哋打打氣啦。