王維基袁莎妮喜結連理 甜蜜滿瀉

黛安噚日聽聞商界有大喜訊，就係人稱「電訊魔童」嘅香港電視創辦人王維基，會同香港總商會總裁袁莎妮（Shirley）拉埋天窗，最近佢兩個嘅擬結婚通知書曝光。港視姊妹都確認咗56歲嘅老闆，會迎娶細佢8年嘅袁莎妮做老闆娘。

不過，呢段戀情一直都收得好密實，近年先畀傳媒影到佢哋兩個撑枱腳。不過，sweet sweet戀情，都好難忍得住唔「放閃」嘅，舊年前財爺曾俊華生日，王維基終於忍唔住拖Shirley現身，公開認愛「宣示主權」。不過，幾時擺酒呢啲細節，暫時都仲未公布，黛安都好期待快啲收到呢個「紅色炸彈」，睇住Shirley着靚靚婚紗出嫁啊。