港鐵 × SCAD香港 深水埗站換新裝

香港18區各有特色，就好似每個港鐵站都會用當區特色做包裝。黛安噚日經過深水埗站，發現車站都換咗「新裝」，原來薩凡納藝術設計大學香港分校（SCAD香港）同港鐵合作，將學生設計嘅藝術品放喺車站大堂同月台。由透明圍欄、站柱以至特別訂造嘅創意座位，都有學生設計嘅畫作及布置。

黛安仲知道，深水埗站月台空間重新裝設咗，由Boroka Kopacz和Najah Dunham設計嘅座椅「Chairs of Sham Shui Po」，既美觀又實用。聽講設計靈感係源自大牌檔嘅摺凳同膠摺凳，以唔同嘅座椅高度，為乘客提供更靈活嘅座位選擇，鼓勵大家等車時多啲交流。而由Nicholas Wang同Savannah Wilkins設計嘅「Urban Identity」圖案，就用於牆壁和隔牆裝飾，用嚟表達車站同社區互相連繫。黛安嚟到深水埗站都睇個唔停，唔講仲以為去咗藝術館！