澳門銀河「紅樓宴」 淮揚菜殿堂大師主理

中國廚藝博大精深，黛安收到風「澳門銀河」綜合度假城，早前舉辦咗一場以「紅樓宴」做主題嘅傳媒晚宴，仲請嚟淮揚菜殿堂級大師居長龍師傅坐鎮，簡直係味蕾、視覺上嘅盛宴！

公關姊妹話，為咗支持澳門旅遊局「2018澳門美食年」，「澳門銀河」即日起至9月8號推出淮揚菜推廣活動，係旗下嘅群芳、鹿港小鎮及巧麵館，都可品嘗到各式各樣淮揚名菜。

早前嘅「紅樓宴」傳媒晚宴，仲請嚟居長龍師傅精心準備菜式，包括白雪紅梅、姥姥鴿蛋、老蚌懷珠等，簡直賞心悅目。原來喺美食紀錄片《舌尖上的中國》第一季，居師傅就被譽為淮揚菜代表人物，以獨特「居氏風格」帶出食材原味，每道菜式都口感豐富，而且更參與過設計出轟動中國飲食界嘅「紅樓宴」！

仲有啊，姐妹話，「澳門銀河」廚師團隊聯同居師傅、《舌尖上的中國》總顧問沈宏非，合力製作一款獨一無二嘅「三松湯包」，入面有松茸片、松葉蟹殼等，加上以松針放入蒸籠內墊底，配以環保吸管，啖啖都係香濃湯包；湯包係限時供應，記得去捧場呀！