海洋公園萬豪6月揭幕 打造節能保育resort

黛安噚日應海洋公園公關姐妹Una邀請，同一班管理層提前食團年飯，知道萬眾期待嘅海洋公園萬豪酒店，希望今年6月開幕。主席孔令成更提前介紹酒店嘅可持續環保元素、酒店大堂內3層樓高圓柱形水族館等，黛安最想知就係房價，原來平均每晚約2,000元，遲啲仲會推出package，迎合不同賓客。

孔令成話，今次係一個新里程碑，主題樂園將結合酒店變成一個destination resort，一日玩唔晒就可以喺酒店住一晚，第二日再玩過。佢又話，海洋公園一直提倡可持續發展同保育，每年都有4至5萬名本地學生參加education programme，酒店開幕後就更可吸引東南亞學生來體驗。

海洋公園萬豪酒店總經理孔憲榮話，今次首次同主題樂園合作，既要保持萬豪品牌高水準，又要有海洋公園可持續發展嘅核心價值，相當大挑戰。酒店3座大樓都用環保外牆設計，用鋁合金建造，可減少紫外光同隔熱，夏天室內可少用冷氣省電費；而環保天台儲水後可淋花。最吸引係大堂內高16米等於3層樓高嘅圓柱形水族館。

海洋公園萬豪酒店市場傳訊總監蔡靜文（Carman）就話，其中2座有328間客房，包括3款、14套富海洋主題客房，面積258至312呎；而另1座則係有143間房嘅Club Wing貴賓樓，由名設計師Peter Remedios設計，專為商務客而設，房間面積280至355呎，包免費早餐、特別check in時間、evening cocktail等服務。Carman話，好多人都想喺海洋公園擺酒結婚，依家酒店就有1個近1.3萬呎宴會廳，可筵開80圍，仲有1間總統套房，同1間珍珠色調蜜月套房。

另外，年初一至初十晚上7點至11點，可免費入去海濱樂園廣場新年節慶景點、香港老大街、食尚水都同海龍王餐廳。海龍王餐廳仲有$880兩位嘅新年套餐，仲附加免費泊車！