2美少女騎師 代表香港出戰馬術大師賽

黛安一直覺得馬係人類最佳戰友。今個星期五至日喺亞洲博覽館舉行嘅「浪琴表香港馬術大師賽」，代表香港出賽嘅馬會馬術隊2名騎手賴楨敏同黎嘉怡，噚日亮相見傳媒，佢哋話到時一定全力以赴！

2010年亞運及兩屆全運會獎牌得主嘅賴楨敏，今年係第三次參賽，佢話舊年表現未如理想，今年一定會盡全力克服挑戰，取得比舊年更好嘅成績！而舊年喺全運會奪牌嘅黎嘉怡，就係第一次出戰，佢就話會用輕鬆嘅心情面對，對成績唔會有太大期望，因為已經達成夢想，可以喺國際舞台上，同頂級馬術騎手同場較技，已非常開心同期待。嘉怡今次喺大師賽入面，更會參加5項比賽，認真厲害！

而喺大師賽第一日，嘉怡同楨敏會分別與馬會騎師何澤堯同梁家俊拍住上，參加「香港賽馬會騎師馬術接力賽」。大家到時記得一齊為佢地加油啦！

呢兩位美少女長年都喺外地受訓，楨敏講笑話，已唔記得自己對上一次喺香港過年係幾時。今次難得可以農曆新年前返港，同屋企人一齊過年，終於可以一家人齊齊整整食年糕，真係好開心。

黛安知道「浪琴表香港馬術大師賽」，一向被譽為馬術場地障礙賽大滿貫之一。馬會作為創辦夥伴，一直提供各項專業支援，好似馬匹運輸、獸醫服務、場地設計同馬房管理等。為咗推廣馬術，馬會仲邀請咗1,600位基層市民同學生入場睇比賽！黛安都決定要去見識下！