康泰名家品味行 跟楊崢遊東京浸第一溫泉

黛安之前同康泰好姐妹Cherie傾開，知道原來好受歡迎嘅「名家品味行」明年請咗名模才女楊崢（Vanessa）做「榮譽領隊」，佢喺3月1日出發嘅第一團，會帶客人行遍日本東京、草津，仲會去享受日本溫泉百選第一名嘅草津溫泉！餐飲方面都好豪華，包括有兩間米芝蓮餐廳，仲有百年老店川越Ichinoya嘅鰻魚料理等，包保滿足到大家對美食嘅渴求。

康泰董事及行政總裁黃進達（Jason）都話，未來會物色更多有全方位旅遊經驗嘅名人同Kol帶團，又大讚Vanessa主持過好多旅遊飲食同品酒節目，未來仲想Vanessa帶多啲團咁話。