著名雜技團來港 友邦歐陸嘉年華獻技

今年嘅聖誕節目特別多！黛安每年都會去嘅友邦歐陸嘉年華，今年仲會有雜技團The Great Circus of Europe表演，即日起可以網上買飛啦，好期待啊！

公關姐妹話，雜技團嘅來頭唔小，係由有超過98年大型雜技製作經驗、曾經係世界各地巡迴表演嘅Gandey World Glass Production製作，總共有25位來自英國、哥倫比亞等地嘅專業表演者，為大家帶嚟各種高難度絕技表演，包括環「球」飛車、The Gerlings高空踩鋼綫、宇宙巨輪，每個表演都驚心動魄，挑戰人類極限！雜技團門票由$150至$400，可以喺http://www.tgec.asia買到。黛安就已經買咗飛，到時一於先睹為快。

今年嘉年華有約30個機動遊戲，成人門票$130，包10個電子代幣；小童係$90，包7個電子代幣。