毅行者冀籌$3600萬 助扶貧救災

又到一年一度嘅毅行者啦，主辦機構樂施會噚日就宣布今年有5,200人參加，好厲害啊！而友邦香港「AIA Vitality健康程式」仲宣布會喺未來3年繼續做首席贊助機構，全力支持活動。

「樂施毅行者2017」會喺今個月17至19號舉行，大會目標係籌款3,600萬蚊，作為支持樂施會喺香港同全球各地推行扶貧發展、救災、政策倡議工作。樂施毅行者籌委會主席陳智思話，毅行者已發展成一項國際體育盛事，今年會喺17個城市舉辦毅行者，無論學生、專業人士抑或傷健人士都參加。香港就有截肢者馮錦雄，佢喺太太同隊友支持下已完成7次毅行者，最快完成時間係25小時！

今年友邦香港已係連續第3年以「AIA Vitality健康程式」名義擔任首席贊助機構，仲破紀錄派出36隊、共144名員工參與。