去海洋公園學飲清酒 石Sir都嚟「漱一漱」

海洋公園4月時搞過「清酒美食祭」，好多姐妹都同黛安講想再試一次。出名好客嘅海洋公園主席孔令成（Leo）又點會聽唔到大家心聲？上周六，Leo請食飯，就特登請咗日本酒代理商Gilbert教大家幾招，原來特別清酒有特別飲法。

Gilbert話，有啲清酒需要長啲時間唞氣，如果無時間，可用個速成方法，飲嘅時候，低頭含住啖酒喺口裏面「漱一漱」，等清酒風味更香醇。成日教大家點投資嘅《經濟日報》副社長兼研究部主管及《晴報》專欄作家石鏡泉（石Sir）同Leo齊齊「漱一漱」，氹到大家鬼咁開心。

Leo仲帶咗兩隻私伙分別風乾咗72個月同120個月嘅西班牙火腿宴客，有錢都唔易食到。當晚，海洋公園更用上「咖喱魚蛋豬皮」做前菜，夠晒盞鬼兼貼地，大家都激讚好味又得體。