周凱旋撑e-sports 擬贊助女子電競隊比賽

潮流興電競（e-sports），打機不再是「玩物喪志」，反而係最火熱嘅新興產業。黛安噚日出席電競裝備商雷蛇（Razer）上市簡介會，見到李嘉誠旗下維港投資負責人周凱旋（Solina），佢話對電競好有興趣，對打機亦有心得，連手掣都用Razer嘅出品，仲話自己喜歡打《街頭霸王》，最愛角色係出名「睇得又打得」嘅春麗，果然真人不露相，無論係商界定遊戲界都係「女強人」。

Solina仲話，公司女同事都好迷電競，仲籌備緊贊助一支女子電競隊伍，等女仔都可以「打出生天」；不過贊助哪一隊同幾多錢暫時就保持神秘。佢仲話試過打機打到太激動，整親對手，「搞到瘀晒」。

既然玩到咁投入，自然係睇好呢行發展。對於Razer上市，維港投資早已入股2,500萬美金（約19.4億港元）。

認同Razer具潛力兼有活力

Solina話，投資主要係睇中Razer成長潛力，又讚Razer公司充滿活力同市場定位思考得好清晰，係有「生活品味」嘅品牌。至於Razer上市後會否增持，Solina笑住話唔可以代「誠哥」做承諾，但佢私人就考慮再加碼，仲透露依家維港投資都接觸緊多間同現有業務關係密切嘅初創企業，未來都循呢個方向投資。