麥當勞叔叔之家慈善晚宴 小勇士分享抗病經歷

黛安日前應麥當勞香港董事總經理黎韋詩（Randy Lai）邀請，好開心去咗「麥當勞叔叔之家慈善基金」年度慈善晚宴，現場各位善長仁翁個個都有錢出錢、有力出力，真係要鼓掌支持！

而令黛安最感動嘅係，麥當勞叔叔之家慈善基金，一直都好努力去改善病童同佢哋家人嘅生活，其中一個例子就係當日到現場分享嘅小勇士Rachel。Rachel喺麥當勞叔叔之家住咗9個月，佢媽咪話好多謝基金嘅幫助，畀佢同細佬可以陪家姐Rachel住喺麥當勞叔叔之家，一齊對抗病魔之餘，家姐同細佬仲friend咗，兩姊弟現時感情非常好。

公關姐妹話，只要捐18,000蚊，就可以支持一個家庭住喺麥當勞叔叔之家3個月，而第一個捐錢嘅就係藝人林嘉欣（Karena）。當晚Karena仲帶埋兩位千金嚟做神秘嘉賓，呼籲大家落力捐錢支持。

當晚氣氛好熱鬧，但講到全晚高潮，肯定係歌手韋綺姍做演唱嘉賓。佢唱咗3首歌，其中第2首就係名曲《相逢何必曾相識》，仲邀請咗麥當勞租務部嘅Alan Yau同佢合唱，教埋佢點走位，睇到大家拍爛手掌！