信興主席蒙德揚 獲理大榮譽博士學位

相信唔少人都可能用過信興代理嘅電器，掌舵人蒙德揚日前就獲理大頒授榮譽工商管理博士學位，理大校長唐偉章教授大讚，蒙博士除咗係成功嘅企業家之外，仲係一個大慈善家，為教育出過唔少力！

信興屹立香港64個年頭，創辦人蒙民偉當年白手興家，憑個「信」字同日本松下電器產業株式會社握手合作，無簽任何合約，將日本家電引入香港。直到蒙博士接手爸爸嘅電器王國後，生意蒸蒸日上，仲不忘回饋社會。

理大日前就向5位傑出人士頒授榮譽博士學位，包括蒙博士。

唐教授話，蒙博士一直慷慨支持香港、內地和海外唔同範疇嘅公益項目，好似捐助多間大專院校成立獎學金、改善校園設施等等，以READ@PolyU閱讀計劃為例，捐錢之餘，佢仲騰出寶貴時間同學生分享寫作和閱讀經驗，實在非常難得。