名師打造海運觀點 歎美食兼賞270°維港海景

呢幾日fb最多人share嘅就係海港城海運大廈全新觀景台「海運觀點」，喺個度可以一邊歎美食，一邊飽覽維港270度無敵海景，相信會變成另一個打卡熱點！

黛安成日覺得維港夜景係百看不厭，仲係全世界最靚。

呢個觀景台樓高5層，三面環海，歷時5年興建，聽公關姐妹話，原來呢個項目係由國際知名建築師事務所Foster + Partners設計，香港國際機場、滙豐總行就係出自創辦人Norman Foster嘅手筆，果然重量級！

九龍倉執行董事凌緣庭就同黛安講，想帶啲新元素畀大家，所以決定唔做零售，反而開咗11間餐廳，可邊食、邊欣賞無敵靚景。黛安日前就試咗來自意大利米蘭嘅Paper Moon，聽講餐廳入面部薄餅烤爐，重達1.4噸，係由米蘭海運到港，由上水至搬入餐廳，足足用左8個鐘！凌緣庭仲話今年下半年零售市道畀預期好，對明年市道都好樂觀。