D2 Place喪屍市集趁墟 提早過萬聖節

黛安唔算好大膽，但每年10月嘅Halloween節目多多又「搞鬼」，所以都幾期待！好似荔枝角D2 Place就將聯同迷宮市集Maze Market，明日起一連兩日（14-15/10，1pm-9pm）大搞喪屍主題融合創意市集，屆時除咗有大量喪屍洶湧而出，仲有前所未有嘅恐慌購物體驗等「應節」！究竟有幾得人驚？真係要去睇睇先知。

D2 Place公關姊妹話，適逢萬聖節，佢哋喺為期兩日嘅喪屍市集內，除咗有大量喪屍出場，超過120個KOL、社企、自家設計品牌等單位亦會參與，齊集各式特色手作、古着及應節萬聖節小食或飲品。講到嚇一定唔少得喪屍啦，市集內設有狙擊喪屍有獎遊戲，大家只要喺隱藏CHECK POINT，避開喪屍並成功集齊印仔就可換領精美禮物，換完即止。

如果覺得齋狙擊唔夠喉，市集內亦有生化喪屍化粧攤位，只需$40起就可以變粧。除咗恐怖喪屍粧，仲有靚靚face painting㗎！總之好玩同過癮嘢真係數都數唔晒，大家千祈咪錯過嘞。