7-Eleven推Pixar陶瓷碟 5個印花加$22換購

黛安係Pixar超級粉絲，所以之前7-Eleven聯乘Pixar換購Pixar之星陶瓷碗，當然即刻狂儲印花換齊啦！當時黛安已心諗，有咗碗，如果有埋碟就更perfect嘞！估唔到依家真係「心想事成」，6款超可愛嘅Pixar之星陶瓷碟，下星期三開始喺7-Eleven有得換購嘞！早兩日7-Eleven嘅好姊妹仲寄咗一套送畀黛安，質量認真唔錯，簡直靚到愛不釋手。

共六款 下周三推出

今次可供換購嘅6款陶瓷碟，包括三眼仔、勞蘇、巴斯光年、大眼仔、毛毛同阿愁。為咗凸顯Pixar動畫30周年嘅慶祝主題，碟背面仲印有30周年嘅標誌，收藏價值非常高；而且陶瓷碟嘅耐受溫度介乎0℃至100℃，適用於洗碗碟機及微波爐，真係又靚又實用啊。

如果大家同黛安一樣，都想將咁靚嘅陶瓷碟帶返屋企，記得由下星期三起（10月18日至11月14日），喺全綫7-Eleven（迪欣湖及迪士尼行政大樓分店除外）購物儲印花，憑5個印花加$22，就可以隨機換購Pixar之星陶瓷碟一款嘞！7-Eleven公關姊妹仲透露，除咗呢6款陶瓷碟，嚟緊更有神秘限量版產品將於第二階段登場，大家記得留意啦！