千顆黑白水晶鋼琴 慈善拍賣1170萬成交

鍾意鋼琴嘅朋友一定有聽過Steinway & Sons呢個過百年歴史品牌，呢個德國鋼琴製造商之前就同法國水晶品牌LALIQUE合作，製造咗一台鑲嵌1,043粒黑白水晶嘅鋼琴《水月玲瓏》（Masque de Femme），全球只此一台，非常之矜貴。據講單係鑲啲水晶上部琴度，已經要用500幾個鐘！所有工序都一絲不苟。啲水晶以噴泉式嘅幾何圖案呈現，寓意「生生不息，無窮無盡」，真係極具觀賞同收藏價值㗎！

最近呢部鋼琴就喺中國嘉德5周年慈善拍賣會上以港幣1,170萬元成交；黛安知道，拍賣收益扣除開支之後會全數撥捐愛佑慈善基金會，為呢部鋼琴增添多一重意義。