中銀紀念鈔 投資收藏具價值

呢幾日嘅全城熱話，一定係中銀香港推出百年華誕紀念鈔喇！今次紀念鈔採用「樓中樓」、「票中票」設計，真係兼具紀念意義同收藏價值。紀念鈔明日就開始接受認購，黛安噚日特登打咗俾90後錢幣收藏家好友、香港真藏（荃灣）負責人張頌昇（Anthony），請教下佢專業意見。Anthony話，中銀香港係香港三間發鈔銀行之一，百年華誕出紀念鈔，好有紀念性，加上售價亦唔算貴，抽嚟收藏或者長綫投資都唔錯。

Anthony仲話自己都打算申請認購，會申請5張單鈔同1套3連張，用盡上限；至於30連張，因為始終比較貴，佢就仍然考慮中。

今次中銀推出嘅紀念鈔，總數有500萬張，扣除成本之後收益會捐作本地公益慈善用途，仲會有388套留嚟慈善拍賣，唔止有紀念價值，仲可以做善事，一舉兩得。黛安都摩拳擦掌，準備聽日就申請！