StellaLou進駐港迪士尼 Duffy精品銷量 7年增10倍

號外！Duffy好友StellaLou終於嚟香港迪士尼樂園同Duffy、ShellieMay、Gelatoni成班朋友團聚，各位姊妹由今日開始去樂園就可以搵到StellaLou，兼且同佢近距離接觸喇！仲可以品嘗StellaLou主題美食，同埋選購今年會陸續推出嘅150件獨家商品𠻹。

着住芭蕾舞裙同舞鞋嘅粉紫色小兔StellaLou，自東京迪士尼海洋喺今年上半年推出以嚟，就憑住可愛外形不斷人氣急升。今次佢終於進駐香港迪士尼，一班粉絲噚日就專程由世界各地嚟到香港，同Duffy佢哋一齊歡迎佢。有嚟自日本嘅粉絲話，係得香港樂園先可以畀佢同Duffy & friends近距離會面，開心死佢！

受捧程度僅次米奇

黛安仲聽香港迪士尼商品營運綜合策劃經理陳偉賢講，原來Duffy嘅產品都好受遊客歡迎，自從樂園2010年將其引入香港，短短7年時間，Duffy與好友系列商品嘅銷售額更錄得超過10倍增長，銷量僅次於米奇米妮系列，好有人氣！

由今日開始，StellaLou會長駐香港樂園入面「我與DUFFY遊歷之旅」呢間小鎮影院，係全球唯一可以同StellaLou影相同近距離接觸嘅機會！而樂園商店亦將推出嘅近40款全新StellaLou毛公仔、文具、服飾等商品，好多都係香港獨家㗎。