挪亞方舟玩親子競技遊戲

小朋友嘅悠長假期即將開始，各位已經做咗媽咪嘅姊妹諗好帶佢哋去邊度玩未呢？黛安聽聞，挪亞方舟今年暑假會舉辦周末活動，推出一連串機械智能遊戲畀小朋友玩，仲會搞親子競技活動，家長同小朋友可以合作競技，提升親子關係，啱晒咁多位爸爸媽媽帶埋活潑好動嘅馬騮仔一齊去玩。

周末特備活動「玩轉機械智激FUN」嘅遊戲，包括有單車驅動微型賽車遊戲、樂高車動物大遷徙、機械智慧尋寶遊戲等，玩樂之餘又可以接觸機械運作，寓學習於娛樂！而「親子智趣競技場」就有划槳滑板車、運氣球、巨型飛鏢等等遊戲，鬥智鬥力，考驗大人小朋友嘅合拍度同團隊精神。