全球首本限定Marvel漫畫 登陸海港城

黛安一直都好鍾意Marvel電影，知道香港迪士尼樂園最近有新搞作，由今日起到7月30日嘅朝10至晚10，會喺尖沙咀海港城露天廣場舉辦「Marvel夏日超級英雄」活動。屆時會展出全球首本限定Marvel漫畫「Iron Man Experience︰Hong Kong Heroes #1」嘅巨型立體書同六個放大版漫畫，黛安絕對要同1比1大嘅鐵甲奇俠影番張靚相打卡啦！

據講漫畫以香港為背景，駐香港嘅漫畫家黃孝勇同香港畫家黃毅龍都有份去構思同製作漫畫，漫畫仲會有一位新嘅超級英雄登場，粉絲們千祈唔好錯過呀。屆時喺海運大廈地下中庭仲有「Marvel夏日超級英雄訓練站」，會展出5個唔同嘅超級英雄，各位粉絲，今次真係機會難逢。