荔園茶餐廳 下月8日開張

荔園返嚟喇！聽到呢個名，黛安就不其然興奮起來，點解？因為荔園衝出嘉年華，打造全新茶餐廳呀！今年正值荔園成立68周年，所以特別揀喺6月8號好意頭日子開張，接住第二日就正式做生意！茶餐廳為咗保留昔日樂園嘅神髓，設計以淺色同橡木為主，天花上有旋轉木馬同拱形木吊燈，令大家好似喺荔園入面食嘢一樣。

咁有咩特色食物？黛安睇咗menu，久違多年嘅荔園雞脾今次就搞搞新意思，配埋豉油皇銀芽炒麵推出，仲有由荔園恐龍屋代言人DINO做生招牌嘅咖喱，認真期待茶餐廳與眾不同嘅新味道！茶餐廳地址喺尖沙咀加連威大廈地下，朝10晚11營業，星期五、六同紅日前夕延至12點關門。