坐國泰A350飛台北 遇貼心空姐 照顧抱B媽咪

剛過去的周末，黛安去咗台北三天探朋友、順道到宜蘭玩。沒想到短短一小時的航程，居然可乘搭到A350客機，真是喜出望外！A350客機因為比較慳油，經常用作飛長途綫。原來客機半夜飛完歐洲等國際綫後，有時日頭亦會飛台灣或新加坡等短途綫，務求善用客機。

體貼客人需要

黛安之所以咁鍾意搭A350客機，除咗因為機艙較為寧靜，另一原因係只要付費就可無間斷用Wi-Fi同外界接觸，無論處理公務抑或更新社交網都夠晒方便。

今次旅程仲發生咗一段小插曲：話說黛安乘搭的航班客滿，櫃台職員將一位男乘客upgrade咗去商務客艙，後來發現佢原來與太太及一名手抱BB同行，該男士本打算上機後將商務位讓畀太太，等佢同BB坐得舒服啲。沒想到當佢哋去到登機閘口，職員請佢哋等咗陣，連佢太太的座位都一併upgrade埋，等佢哋唔使分隔機艙兩處。黛安之後細細聲問空姐箇中緣由，她笑謂希望咁做可方便丈夫照顧太太，所以剛才先請示上司批准，其體貼細心的服務值得一讚。

黛安都係經常出差的人，多年來搭過不下60間航空公司，國泰的服務稱得上係好好。有時聽到人批評國泰，都會諗一諗，當大家享受緊咁有質素的服務，係咪真係要用咁尖酸的字眼去批評呢間咁努力的香港公司呢？實在值得大家深思。