到九龍城「菁雲」 買添好運年糕

黛安經常幫襯嘅野生食用菌專門店「菁雲」，一個星期多前喺九龍城侯王道開分店，開張日黛安亦有到場辦年貨。

「菁雲」創辦人是上環食品出入口老店聯記號的第三代掌舵黃敏詩（Winnie），佢因積極推廣雲南野生食用菌，朋友都稱呼佢做「Winnie the菇」。Winnie係叻女一名，賣菇賣到有6,000幾個會員，今次擴張是照顧新界及九龍客戶需要，唔使佢哋特登過海入貨，真係細心。

開張日黛安見名廚周中、余健志（Jacky Yu）等及好多熟客，場面墟冚，擠得新店水洩不通。咁多人嚟捧場，Winnie亦早有預備，即場捧出好多美食招呼來賓，好似西班牙燜乳豬、黑松露雪糕等等，仲有型仔法國菜名廚張錦祥（Ricky Cheung）嘅即食西餐，包括羊肚菌燴羊腩、香草鮮茄牛肝菌肉丸等，黛安大飽口福。Ricky嘅即食菜當日做特價，不少顧客試食完都掃走幾盒。

以往黛安主要幫趁Winnie買松茸、牛肝菌，用來焗飯或清炒，新年臨近，「菁雲」亦引入米芝蓮一星餐廳添好運多款鹹甜年糕，黛安亦買咗幾底返屋企。

工廈設廚藝教室

講開年糕，Jacky Yu嘅囍宴亦有自家年糕出品，聽講Winnie之前亦打算問佢攞貨，但Jacky話今年年糕大賣，未到新年已賣出兩萬幾底，比上年多咗一倍，自己都唔夠賣，所以無辦法畀貨「菁雲」喎。

呢位以經營「囍宴」私房菜而蜚聲飲食界的名廚仲同黛安講，今年將喺黃竹坑租用工廈，開設大型私房菜館及廚藝教室，換言之，遲下有更多機會試到Jacky嘅手勢。

此外「菁雲」亦有供應好多上級乾貨，例如專門接待元首的釣魚台國賓館採用的宣威火腿，以及健康產品，例如專欄作家「LingLing姐」李韡玲嘅天然美容產品，相信像黛安般追求質素的人定會搵到心水。