梁進馬仔 幫美心畫惜食漫畫

「惜食」唔單止係環保議題咁簡單，仲變成一種潮流。日前黛安喺facebook接獲朋友邀請，一齊製作「惜食」漫畫。遊戲係美心集團嘅新搞作，叫做「麵包的一天」。

一開始玩家可自行選角：排包、紅莓包、叉燒包、方包，全部都係美心熱賣產品，之後故事發展由你話事。吓？唔係要自己畫吖嘛？唔使擔心，美心一早搵咗星級插畫師梁進及馬仔，畫定唔同情節畀你揀。不過，你只可決定頭一格嘅內容，劇情往後點樣發展？你需要喺facebook搵朋友幫手共同創作。黛安聽美心嘅姊妺Esther講，兩位插畫師一共畫咗八個結局，想睇晒八個麵包的命運，就要落力啲玩。

捐麵包予有需要人士

其實，美心自四年前開始將剩餘麵包捐畀慈善機構。現時每晚八點到九點半，都有社福機構義工到全港逾200間美心西餅及東海堂收集麵包，轉贈畀有需要嘅人，至今有60間機構受惠。佢哋每月仲會派出義工隊，放工後幫手派麵包。

既然都做得咁好，點解仲咁「揼本」搵人氣畫家推出遊戲宣傳？Esther話因為兩位筆下主角夠晒可愛，相信大家玩完，會更加愛惜食物。

Esther又同黛安講，如果平日屋企麵包食唔晒，除咗捐之外，仲可以用嚟做「麵包布甸」，加啲牛奶同雞蛋拎入焗爐焗，即刻「升呢」變成另一款增值美食。