楊偉添下月開騷 賀恩師80大壽

眾所周知，港龍航空行政總裁楊偉添（Patrick）唱歌了得，而且仲好識尊師重道。話說今年係佢嘅歌唱老師倪承豐80歲大壽，為咗賀恩師生辰，Patrick特登聯同一班同學仔，搞咗個「八一知音聚」，下個月一號晚喺香港大會堂音樂廳為恩師獻唱。

黛安聞說Patrick已經預備咗幾首英文、法文及德文嘅歌曲，喺恩師面前一展歌喉，包括Grieg嘅《A Dream》，以及兩首旋律優美、分別來自歌劇《浮士德》及《風流寡婦》嘅樂章，相信倪老師見到一班學生咁有心，必定大為感動。

除咗Patrick之外，嘉華國際集團主席呂志和千金呂慧瑜（Paddy）、第一代華人測量師兼執業大律師簡福飴亦係演出嘉賓。黛安記得Patrick講過，十幾年前就係透過Paddy介紹，先至開始跟倪老師學唱歌，所以Paddy可算是Patrick嘅師姐。

跟「中國之鶯」學藝

倪老師對Patrick愛護有加，不但經常帶佢去欣賞其他同學嘅演出，藉以提升唱歌水準；仲同過Patrick返上海老家，拜會有「中國之鶯」美譽嘅著名女高音歌唱家周小燕，所以Patrick駐內地工作期間有機會跟周老師學藝，都係拜倪老師所賜。

下個月嘅音樂會，倪老師嘅門生兼名歌唱家曹金、于克勇等，都會訪港獻唱。大會堂票務處稍後會提供小量門票供市民索取，有心人不妨前往查詢。