1288元歎如意宴 欣賞華美餐具

愛吃日本懷石料理，不但食材講究，盛載料理嘅精緻器皿更是賞心悅目，中餐卻少有同等嘅視覺享受。最近新滬坊與法國瓷器品牌LEGLE合推嘅「如意宴」，就滿足咗黛安呢方面嘅要求。

新滬坊食物水準向來超卓，配上一套融入中國幾千年藝術歷史嘅餐具，更是畫龍點睛。前菜為一道以九宮格排列嘅拼盤：浸過柚子醋嘅翡翠涼瓜、香杧芝士牛肚菌、紫彩豆腐羹等，食味豐富，口感多樣；底下嘅碟子更引人入勝：元明嘅釉裏紅、明清嘅青花、豆青色嘅祥雲圖案、層層相疊嘅奇石圖......配搭精緻，真係唔捨得食落肚。

每套餐具值兩萬

餐具設計師張聰（Desmond），大學主修藝術，家族從事陶瓷生意。兩年幾前，Desmond同另一名識煮又識食嘅香港設計師Peter Ting傾講，點解中國無靚餐具，決定「的」起心肝自己設計。二人走遍大英博物館、故宮等取材，終製成呢套華美嘅「如意」餐具，今餐飯每位只係1,288元，但每份餐具嘅價值就高達兩萬。

而新滬坊所屬嘅會展管理公司飲食總監江志恒（Maurice）亦在菜單下咗不少心思，黛安尤愛兩款甜點：一款係由Sauvignon blanc製成嘅果凍，晶瑩啫喱將鮮花及水果凝住，令人眼前一亮；另一款永利威五加皮雪糕則充滿本土特色。

Desmond透露，稍後將與食家劉健威嘅「留家廚房」合作，推出以粵菜為主打嘅「如意宴」，黛安期待下次試菜。