搭港龍歎太興奶茶 配蛋撻菠蘿包

港式奶茶係香港嘅特色之一，黛安都好鍾意經常歎番杯。一向致力推廣香港地道美食嘅太興，又有新搞作喇！自從2014年第一次同國泰港龍航空合作，將罐裝奶茶送到3萬5,000呎高空後，太興今年再次同國泰港龍聯乘，由即日至5月15日，只要乘坐由香港出發的大部分航綫頭等、商務及經濟客艙，都可以飲到港式地道奶茶！

唔單止咁，港龍同一時間仲會向乘客推出酥皮蛋撻、菠蘿包同雞尾包𠻹，簡直好似將成間港式茶餐廳搬上半空咁呀！黛安所知，酥皮蛋撻及菠蘿包會喺香港前往北京及上海指定航班的頭等及商務客艙供應；而頭等客艙更提供雞尾包𠻹！原來要喺飛機供應酥皮蛋撻都幾有挑戰性㗎，餐膳團隊經過努力研究，先掌握到機上烤焗的程序同時間，又特別用上全鮮奶，加上特別比例的鮮忌廉及雞蛋來調配，咁先可以保持蛋撻獨有酥香和軟滑質感喎！