卡樂B香港店1歲生日 推限量巴士模型

Okashi Galleria x Calbee+香港1歲生日喇！早前萌爆的宅卡B卡通代言人Potta，現身主題單層巴士穿梭港九，氹到一班大、小朋友都好開心，仲吸引粉絲瘋狂合照！為慶祝生日，Okashi Galleria x Calbee+將會喺今個星期六（25日），推出限量版1:76巴士模型，每架都有獨一無二的編號，車身有Potta可愛慶生造型配上繽紛色彩圖案，仲有卡樂B宅卡B熱浪香辣味薯條禮盒（香港版）同「香港限定」等字句，製作細緻又精美，像真度甚高！

巴士模型每日只售150架，每人限買2架，每架$498，部分收益會撥捐鄰舍輔導會支持本地青少年服務，真係好有意義。聽講今次巴士收藏價值好高，加上今次係全球獨家發售，相信誓必掀起搶購熱潮！提提大家，Okashi Galleria x Calbee+話當日首20位客人，會獲贈宅卡B珍藏版雙層巴士模型1架，價值$569㗎！而且只限一日，巴士迷萬勿錯過呀！