滙豐首間日夜理財中心 沙田開幕

以往去銀行的24小時理財中心，一般只會見到各式各樣的櫃員機，不過沙田水泉澳邨的理財中心就好唔同，居然有職員serve客，令人耳目一新。查實呢間分行，係滙豐首間以全新模式作招徠的「日夜理財中心」，除咗提供24小時自助銀行服務之外，喺銀行營業時間亦會有兩位職員同一位服務大使坐鎮，為附近居民提供開戶口等面對面的基本銀行服務，認真貼心。

昨日係呢間分行的開幕禮，黛安遇到前來剪綵及切燒豬的幾位滙豐管理層，佢哋仲話畀黛安聽，嚟緊下個月3日，滙豐會增設第二間流動銀行，逢星期一至六游走於荃灣、葵青、深水埗、黃大仙、觀塘、沙田等共12條公共屋邨之間，服務市民，無論你想提存現金、申請支票簿或處理信用卡服務，都可以搵流動銀行幫手㗎！