希慎試米芝蓮級雞蛋仔

雞蛋仔，細細個就開始食啦！但講到食雞蛋仔嘅藝術，就唔係人人精通。希慎興業及利園協會就係本周六日（4日、5日）搞咗全港首個「雞蛋仔藝術節」，除咗搵知名嘅米芝蓮推介香港街頭美食品牌「媽咪雞蛋仔（灣仔店）」等8間餐廳及雞蛋仔專門店助陣，畀大家試下獨創口味兼期間限定嘅雞蛋仔，仲搵知名建築藝術家黃卓健來設計「雞蛋仔皇后寶座」，有得食之餘亦有得影相。

本地著名手指繪畫藝術家Justin Y都會即席教參觀者用紙蛋托整「七彩雞蛋樹」，同場仲有爵士樂團體獻技，又有市集賣手作仔，仲要成個活動入場免費，行過唔睇下就走寶喇！