協青社搞街舞劇 幫邊青做Hero

自從幾年前在時任「築福香港」工作小組主席Leonie（紀文鳳）介紹下，參與過震動人心嘅「狂舞派對」，黛安對協青社嘅服務留下深刻印象。噚日黛安又去咗協青社捧場，話說佢哋旗下「嘻哈學校」，一向用街舞做介入點，幫青年搵人生方向，嚟緊4月2號仲會表演街舞劇《東•南•西•北•中！》，大會昨日搵咗幾位「好跳得」嘅年輕人宣傳，精采舞步睇到大家熱血沸騰。據講到時協青社榮譽顧問劉鳴煒客串露兩手，認真期待。

劉鳴煒客串露兩手

噚日會上，黛安重遇於狂舞派對活動有一面之緣嘅阿齊，佢依家係協青社街舞劇編劇及導演，但其實多年前曾誤入歧途，中三輟學一度加入黑社會，機緣巧合下去協青社跳街舞，跳足13年。佢話：「學校老師睇死我讀唔到書就無前途，但跳舞畀到我滿足感！」後在朋友介紹下，佢去咗24小時開放、俗稱「蒲吧」嘅協青社做嘢兼跳舞，阿齊之後喺「嘻哈學校」擔任舞蹈教師至今，用身教幫迷途青年藉跳舞搵人生方向！佢3年前仲去到美國舞蹈學校進修，參加比賽攞獎。能夠搵到自己的舞台發熱發光，黛安真心替佢高興。

正如Leonie講，每個青少年都係hero、superstar，只係需要有人喺背後推動，黛安亦深感認同。呢班年輕人4月演出後，5月將會喺亞洲中學生校際嘻哈大賽中選拔學生，為港爭取青奧入場券。黛安喺呢度預祝佢哋Good Show！