入場費$168 玩轉海洋公園夜場

香港人做慣咗夜貓族，weekend都會約齊大班人去happy hour。海洋公園早前預告嘅夜場「Chill Out@The South」終鐵定喺3月17日登場，仲要橫跨成個復活節假期，短短19日就有3個主題活動，除咗有清酒、手工啤酒同米芝蓮星級餐廳攤位外，更有迷你音樂會、街頭表演，入場費為168蚊起，包括50蚊現金代用劵。

話到明係「夜場」，又點少得美酒！活動分階段以唔同主題舉行，第一輪率先出場嘅就係港人最愛嘅日本，在場20個攤位帶同多個首次在港亮相嘅清酒品牌，仲可以品嘗由日本進口嘅頂級和牛、香港築地•山貴水產市場嘅招牌菜，都可以喺海洋公園食到；而第二輪係4月舉行嘅啤酒音樂夜，就啱晒鍾意手工啤酒嘅人，包羅多個本地品牌，例如麥子、九龍、門神等，行過少少到「怡慶坊」，仲有迷你音樂會，請來人氣歌手和樂隊出show，真係好Chill！

黛安就最期待復活節假期壓軸舉辦嘅「星級美酒佳餚薈」，即場可食到米芝蓮星級餐廳同名廚炮製嘅美食！

坐港鐵就去到，夜晚去玩就更加方便啦！