着唐裝衫團拜 Sony高層同吳奇隆撞衫？

農曆新年過後，唔少公司都會搞春茗，噚日Sony互動娛樂香港（SIEH）請咗黛安參加春茗，同場有成百位記者捧場，相當熱鬧。公司董事總經理所鉄朗（Tetsuro Tokoro）雖然是日本人，但全場着得最應節就係佢，Tokoro san（日文先生的意思）着咗成套暗紅色唐裝，件衫仲繡咗幾條金龍，佢上台發言時仲好開心咁問大家，佢係咪成個皇帝咁款，睇來好滿意套衫咁喎！

同事幫手網購

不過好多行家都發覺套衫熟口熟面，好似喺邊度見過咁。市場傳訊部助理總經理趙善盈（Jacqueline）笑笑口話，其實件衫係「吳奇隆同款」！原來舊年藝人吳奇隆同劉詩詩喺峇里島舉行婚禮，正正就係着呢款衫！

Tokoro san身形高大，着起套衫真係幾有型，唔通佢諗住做「日本吳奇隆」？Jacqueline話，其實Tokoro san並唔知套衫係「吳奇隆同款」，佢叫同事幫手搵套應節嘅衫，同事上網一search，頭5件都係呢款，所以就幫佢網購咗返來。

講番SIEH舊年推出咗幾款新產品，好似PlayStation（PS）VR，PS4 Pro同PS4 Slim，賣到斷晒市，Tokoro san話今個月17號同20號，就會有一批PS VR同PS4 Pro新貨應市。