圍標維修商定罪 膺「最大快人心」新聞

消費新聞一向多人關心，黛安亦唔例外。由《晴報》、《經濟日報》、《TOPick》等多家媒體與消委會合辦嘅「猴年十大消費新聞選舉」，結果噚日揭盅。消委會主席黃玉山同黛安講，入選嘅十大消費新聞涵蓋食、住、行、健美、投資等範圍，頭3位獲選嘅新聞分別同迷你倉大火、三星Note 7電池爆炸及加州健身涉不良營銷有關。

至於上年開始新增嘅「最離譜」、「最大快人心」和「最抵讚」主題獎，都有好多人投票，當中「最大快人心」消費新聞就由「翠湖圍標維修商囚35月首宗定罪個案」獲選。黛安覺得圍標案剝削咗消費者權益外，仲累到小業主要畀多好多錢做維修，呢單新聞獲選真係「實至名歸」！