綜論賀歲片大戰

周星馳的《美人魚》去年春節賀歲檔在大陸收了30多億人民幣，今年，食過翻尋味，夥拍「老爺」徐克，繼續搵水，《西遊伏妖篇》幾乎完全用內地明星，林更新飾演孫悟空、吳亦凡飾唐三藏、女妖則由王麗坤及姚晨上陣，在大陸，號召力肯定無問題，但在香港，就要考驗觀眾對他們的廣東話配音的接受程度！今年爭食大餅的亦非善類，最大對手是王寶強自導、自演的《大鬧天竺》，雖然是時裝喜劇，但原來那個「核」，也是西遊記故仔，除王寶強之外，還有岳雲鵬、白客（演過《萬萬沒想到》那個），以及身材勁揪的柳岩，從預售票情況看，兩部片叮噹馬頭！

另外，成龍大哥的《功夫瑜伽》，印度背景，估唔到和王寶強的影片「撞景」，成龍始終有一定號召力，收十億、八億並非不可能，而最大黑馬卻是橫裏殺出的《乘風破浪》，韓寒導演第二部片，卡士有鄧超、彭于晏，大家都認為此片可憑口碑逆襲，後來居上，又起碼收15到20億！分分下，《西遊伏妖篇》會唔會收30億成疑，事實上年年都睇孫悟空，真係會有啲悶！

最讓人擔心是不肯撤檔的《健忘村》，舒淇、王千源、楊祐寧、張孝全，牌面不夠，排片率隨時畀院綫健忘！

（本欄逢周二、四刊登）