海港城 鯉躍龍門行大運

一年容易又新春，過年除咗去拜年，少不免要喺街行番轉大運，揀嘅地方當然愈熱鬧愈有新年氣氛啦。每逢節慶必成打卡熱點嘅海港城，今年就用鯉躍龍門意景做布置，仲利用立體網結營造「魚躍」效果，生氣勃勃之餘，大人細路都咁有「鯉」，新一年想學業進步、平步青雲夠晒啱聽，如魚得水仲好「聚財」㗎。

而灣仔利東街新年期間都化身傳統花燈古街，在成千個大紅燈籠同埋中庭桃花林下行街，夠晒詩意，仲可以應景行下「桃花運」，大年初二仲可以去睇由西班牙幻彩華麗舞蹈團打頭陣的新春巡遊，感受舞團嘅火熱魅力！