麥當勞$10蚊優惠 載譽重臨

2017年新開始，黛安為大家送上第一個好消息呀！麥當勞繼去年初同暑假，推出過10蚊豬柳漢堡買一送一等優惠後，今日起優惠載譽歸來，推出「開心$10 PRISE你」大驚喜！今次麥當勞好有心思，優惠換上新的配搭，好似今日（3日）咁，指定分店喺上午11時後，只要畀10蚊就有9件麥樂雞！

噚日麥當勞公關老友提醒，優惠會陸續有來，聽日（4日）係10蚊兩個漢堡包，後日（5日）嘅分量會再加碼，食到兩件脆香雞翼同1杯細汽水，真係大滿足！至於嚟緊幾日的優惠，佢就話要賣個關子，叫大家留意電視廣告或fb專頁。

不過，噚日喺社交網站已流傳嚟緊仲會有唔同優惠，包括有雙牛芝堡、粟米批、新地蘋果脆、檸蜜雞翼同豬柳漢堡呀，驚喜款式日日新鮮，麥當勞粉絲們不容錯過！