誠哥投資$6000萬 助奧斯卡得主研人工智能

「呢段係動畫嚟㗎？啲表情好似真人一樣，好流暢！」人工智能（AI）係大勢所趨，噚日黛安喺YouTube睇咗段片，一個以AI製作嘅動畫人物，正隔住屏幕向真人學習自然流露嘅表情，一顰一笑都學到十足，好犀利。後來睇番間公司資料發現，原來長和系主席李嘉誠（誠哥）有份投資㗎。

「Baby X」模擬真人情感

一向眼光獨到嘅誠哥過往投資咗唔少成功AI項目，例如蘋果嘅Siri、智能導航程式Waze、開發AlphaGo嘅DeepMind等。聽創科界嘅朋友講起，誠哥新搞作係透過旗下維港投資同Iconiq Capital牽頭，為一間AI公司Soul Machines籌到750萬美金做A輪融資，折合即係差唔多6,000萬港元！

黛安好奇之下，再睇下Soul Machines係乜東東，原來創辦人好巴閉，佢係奧克蘭大學生物工程研究所嘅學者Mark Sagar，一直都致力研究將人工智能科技人性化、融入日常生活；而佢創辦嘅Soul Machines，就專注開發具智能同情感反應嘅頭像模擬科技，例如有個叫「Baby X」嘅技術，就係一個感應平台，用超像真頭像模擬技術融入AI科技。黛安聽講之前維港投資嘅團隊去大學參觀，對Baby X嘅介紹好深刻，幾乎係即刻拍板決定投資。