海港城聖誕雪人 暗藏密碼！

聖誕節自然會想起雪人，香港唔會落雪，惟有靠雪人公仔增加氣氛！今年海港城嘅聖誕燈飾係由自家設計嘅「小雪翁」公仔組成，原來呢啲造型咁特別嘅「小雪翁」，係出自本土名家湯兆榮（Andy）手筆。Andy話雪人喺大家心目中有個好common嘅印象，點樣可以突破固有形象，令佢煞費思量。佢話過程中畫咗好多款雪人公仔，最終採用現場所見、以兩個橢圓形雪球組成嘅小雪翁，就好似個不倒翁咁，又特別將雪人對眼設計成鈕扣造型，玩味十足。

現場一共有32款設計嘅小雪翁咁多，每個雪人都代表一個「雪人密碼」，分別係0至31號，大家可以去「集郵」搵齊屬於自己生日日期或者電話號碼等私人「密碼」！