空中「歡樂天地」 下周日啟德起飛

為咗飛遠啲，可以去得幾盡？原來就係減磅！事隔兩年回歸香港的「Red Bull Flugtag飛行日」，首次喺啟德跑道公園舉行。噚日黛安去咗睇一班參加者砌飛機，第4次參加的「歡樂天地射牙仔」隊飛行員Mokit笑言，今次比賽以減磅做戰略，除自製滑翔飛機用較輕的金屬鋁製成，令機身減磅三分一外，連自己都要減埋一份，「為咗比賽嗰時輕啲，飛得遠啲，我減咗10幾磅！」可惜黛安無時間，唔係實請教佢點樣keep fit。

為比賽減10磅

講番佢哋架飛機，Mokit話對香港集體回憶情有獨鍾，之前試過以麻雀、紅白機等設計參賽，今年則以小時候常去的「歡樂天地」射牙仔遊戲造型出戰，希望可以重現童年回憶。佢話團隊上屆以18米創下亞洲飛行記錄，今年目標突破自己，飛到18.1米已好滿足。

另一參賽隊伍「HASBRO TOYS」，由3位玩具設計師組成，佢哋酷愛變形金剛奸角「Starscream」，所以用佢做藍圖，耗資4萬幾元造出90公斤的戰機，但就因為重量限制，表演唔到原本先「變形」後落水的構思，希望條蹺下次用得番。

今次飛行日，相信係啟德機場跑道1998年退役後，首次再有飛機在跑道上「起飛」，快啲約朋友去懷緬下啦！