麥當勞慈善晚宴 林子祥與癌童驚喜合唱

最近黛安去咗好多盛事，其中一項要數上月底圓滿舉行的「麥當勞叔叔之家慈善基金」年度慈善晚宴。適逢今年係基金會成立20周年，大會以「A Superheroes Night」為題。公關姊妹同黛安講乃寓意善長多年來出錢出力支持，所以位位都是「大英雄」，真係值得鼓掌！

當晚大家盛裝出席，黛安同《晴報》社長麥華章、麥當勞香港董事總經理暨麥當勞叔叔之家慈善基金董事會成員Randy（黎韋詩），以及企業傳訊高級總監Wendy（林婉梅）同坐一枱，大家傾得相當投契。

活動搞得有聲有色，請咗歌后「肥媽」Maria Cordero獻唱籌款。不過講到全晚高潮，肯定是8歲患腦癌浩浩的分享與演出。當晚他話很感謝麥當勞叔叔之家畀佢入住，令平日佢無微不至的媽媽有機會唞一唞，減輕對方的壓力，是晚呢位生性小孩更為媽媽獻唱一曲《分分鐘需要你》，沒想到唱到中途，此曲的原唱人阿Lam（林子祥）突然現身，同浩浩一同合唱，為全場帶來驚喜，黛安亦聽到眼濕濕！

與譚詠麟食飯 成交價21萬

慈善晚宴還有拍賣環節，為「麥當勞叔叔之家」的日常營運開支和支持基金拓展長遠發展項目籌款。黛安留意到拍賣品相當豐富，最吸引眼球係由名廚Eddy Leung炮製的8人盛宴，更可與「校長」譚詠麟共晉晚餐，機會難逢，原本底價25,000元的盛宴，最後以21萬元成交，比底價高近10倍！這些機會不是黛安的，還是留給善長仁翁吧！