捐$99接受導盲犬引領 太古坊感受視障生活

殘障、少數族裔等人士需社會包容和接納，為咗令大家更能易地而處，太古地產義工諗到一條好蹺：話說今個星期五起一連三日（14-16/10），太古地產會聯同15間社福機構組成「同一添」，喺太古坊ArtisTree合辦慈善活動。除手作義賣攤位、體驗工作坊外，更可在導盲犬引導下體驗視障人士生活。

市民到時可在導盲犬服務中心主持的「與你同行」工作坊，選戴4款特製眼鏡，模擬完全失明或只剩一點視力等效果，在導盲犬引領下穿越障礙，捐款99元便可參與，所有收益撥捐協辦機構。

此外，屆時唱作歌手林奕匡與視障音樂家李軒和李昇更會合唱，而樂隊Supper Moment更代表協青社即場同後生仔jam歌！至於重頭戲就是30位來自不同社福機構及義工化身模特兒，於15及16日各演一場共融時裝Show。據悉今次活動係為咗慶祝太古地產愛心大使計劃投入義工服務15年，真係好有意義呢。