樂視體育英超頻道啟播 評述員用3D戰術板講波

樂視體育香港（LeSports HK）上星期開台，噚日帶大家參觀全新英超演播室，原來佢哋會同Now TV合作播放LeSports HK製作嘅英超節目𠻹！

今屆英超由LeSports HK全權負責製播，直播380場賽事，佢哋做好晒準備，搵咗班好有分量嘅評述員，包括陳婉婷（牛丸）、陳偉豪、何輝、蔡育瑜等。除咗「曬」評述員陣容，噚日品牌乘機「曬」裝備，帶大家去睇佢哋同世紀睿科控股合作打造嘅演播室。演播室有最新、最高質素設備，節目中會用互動擴增實境（AR）3D戰術板，等評述員專業分析之餘，從唔同角度欣賞球賽，再喺賽事分析加入實時數據、球員比拼等。

LeSports HK署理首席執行官賴汝正話，英超係最受香港人歡迎嘅體育節目，品牌投入大量資源取得2016年至2019年三個季度英超賽事香港區獨家播放權，到時觀眾可隨時隨地透過用樂視超級電視同Le TV Box嘅TV應用程式、手機等睇波。