里數換毛衣贈長者 Asia Miles義工送暖

近日寒流襲港，出街成日凍冰冰，黛安卻感受到溫情處處。好似同亞洲萬里通（Asia Miles）CEO黃思遠（Stephen）食飯，預祝猴年之餘，仲知道佢哋一班同事早前齊齊出動為基層長者送上冷衫。

黛安聽公關姊妹講，Asia Miles已經連續三年支持「Love + Hope毛衣送暖大行動」，會員多年來捐出超過350萬里數，即係近1,500件冷衫。會員出里數，Asia Miles同事梗係唔會偷懶。上星期五，即係氣溫開始驟降、好多人都唔願出街時，Asia Miles超過20位同事，就同本地社企L plus H、慈善團體基督教香港信義會社會服務部合作，去葵涌探訪多位長者，送上會員用里數兌換捐出嘅冷衫，仲幫長者清潔家居𠻹！

任職數據科學分析師的Kirill Pavlov原來來港只有數月，參加完活動後，佢話好開心，因為可以了解中國文化，又可以喺佳節前，探訪獨居同行動不便嘅長者。連續三年參與送暖嘅數碼市場推廣助理經理何曉螢話，支持行動因為有三重意義，「員工可當義工親手送暖；會員可捐贈里數幫助弱老；最重要係長者收到禦寒衣物，又可以同我哋交流。」

除咗送冷衫，黛安相信新一年，品牌應該準備咗好多驚喜，Stephen笑住回答，「今年娛樂體驗繼續係重點之一，總之吸引力一定唔會差過舊年！」大家都要密切期待啦！