吉野家北角新店 加推火鍋放題

月初香港吉野家慶祝25周年，西環新店推出一周限定火鍋放題，好多人話意猶未盡，黛安梗係如實向吉野家好姊妹Michelle反映，噚日就收到encore好消息！北角健威坊新店聽日起一連七日，有120分鐘任食任飲放題，老友收到黛安message都話好期待。

火鍋材料選擇照舊好吸引，除咗牛肉、雞髀肉同新出丹麥直送豚肉，仲有超過30款追加配料，包括好受歡迎嘅芝士竹輪。至於，三款湯底就包括再度回歸嘅番茄湯，聽到都想食！留意放題分兩個時段，六點或者八點半，大人138蚊，細路98蚊。