銀通下季推新平台 有手機號碼就過到數

朋友過數畀你通常會問：「用邊間銀行？」遲啲大家會問：「你手提電話係？」黛安唔係講緊「抄牌」方法，而係銀聯通寶（銀通）今年第二季推出嘅「JETCO Pay P2P（個人至個人）服務」，過數畀人唔使再問戶口號碼，有手提就搞掂！

好多人問，唔同銀行都得？使唔使畀charge先？銀通行政總裁蔡炳中（Angus）話，會員銀行第二季會陸續推出JETCO Pay P2P服務，到時完成登記手續，在App綁定銀行戶口，可隨時轉帳，對方即時收到；佢仲話相對其他地方，香港P2P轉帳使用率較低，希望加深消費者對P2P轉帳用途同優點嘅認識，服務會完全免費。

據黛安了解，現階段銀通已同12間銀行合作，大家可以選擇其中一個戶口收錢，「暫時設定收錢限一個戶口，用作支付戶口則可以有多個」。Angus強調，除咗方便快捷、易用之外，佢哋最重視安全，「JETCO Pay P2P會用銀通現有自動櫃員機平台，每次轉帳都要輸入密碼。」