麥當勞Next第一站金鐘

金鐘海富中心麥當勞全新面目「麥當勞Next」曝光，黛安噚日一早去「朝聖」，行到門口，先見到新Logo，簡單綫條，好有型！行入店內，簡約設計，吧枱式餐桌、開放式廚房、點餐櫃枱身變身機場check-in counter，心想「呢間真係麥記？」行到店中間，在Party房遇上麥當勞傳訊一姐Wendy（林婉梅）與同事Amanda，即刻捉住兩位行一圈，八卦「升呢」背後理念。

電子點餐 高透明度

Wendy話，麥當勞Next全球首推，第一站在金鐘，對香港團隊而言好大鼓舞，「今年落足心思提升品牌形象，最想帶給顧客Affordable Premium體驗！」Wendy仲話，今次集結品牌各大精髓，由點餐同用餐環境、食物質素到服務團隊，都有新發現。

首先餐牌、取餐提示全部電子化，店內有九部自助點餐機，所有食物都可以「篤」，細心留意會看到電子屏幕上的小動畫，好似薯條會跳動、小手板想「拎」走漢堡等。另外，成間店廚房各部分都用咗玻璃間隔，等大家隨時看到食品製作過程。

發揮創意 自選沙律

食物方面，除咗Create Your Taste自選漢堡，沙律都有得揀，任你發揮創意配搭！黛安覺得有三款材料一定要加：即叫即切新鮮番茄片、健康唔怕肥的藜麥Cous Cous同香烤雞腿。店內還有幾樣貼心設計，逾300個座位中四分之一設充電設備、自助冷暖水機、洗手裝置等。聽Wendy講，店內的燈光仲會因應時間而調節。