格魯吉亞王子 賜酒葉澍堃

上星期黛安在中環見到王子！好姊妹即時回應：「你有男朋友仲咁花心？」「我係講緊真嘅王子！你睇，王子仲幫我喺支酒度簽名！」黛安所講的王子係自格魯吉亞的Prince Juan Bagration Mukhraneli。今次微服出巡，係為咗宣傳該國出口的皇室御釀葡萄酒。

呢批皇室酒全球只得5,000套，王子睇中港人識飲識食、消費力強，決定率先提供4,000套畀港人優先訂購，仲即場送咗套畀前高官兼食家葉澍堃收藏，每支都有王子的簽名同證書號碼，好矜貴㗎！葉Sir同黛安講，法國、意大利酒就飲得多，格魯吉亞酒佢都係第一次品嘗，仲講笑話飲完自覺變身皇室成員。

不說不知，格魯吉亞釀酒歷史悠久，有8,000年歷史，其技術更被列入聯合國非物質文化遺產。有別於法國人用木桶釀酒，格魯吉亞人選擇將葡萄連枝葉放入陶瓷窖內陳釀。當日黛安試了三款皇室名釀，對其中一款Royal Kindzmarauli的半甜紅酒印象深刻。聽到過當地酒莊參觀的靚女酒評家梁淑意（Rebecca）講，這種酒的出現是由於天氣太凍、酵母停止發酵，令糖分殘留酒裏，造出獨特風味。Rebecca話這種酒用來配濃味食品，例如八寶鴨，或者較刺激的辣味食材同樣適合。