魚樂軒的龍蝦山

中國人飲食，平民百姓街坊街里從個名到個樣，重視喊得出來的富貴。

要求又非幾多個頭鮑魚官燕紅燒翅，大大隻龍蝦並非野生，卻已是百姓眼中寶，隨便擺出，贏盡口碑與視點。食肆從進門開始，更是處處巨型魚缸，內裏閒閒十斤、十多斤甚至廿斤龍蝦與長腳蟹，都咪話唔震撼！

雞油蛋白蒸皇帝蟹（十磅）、招牌雙頂龍蝦二吃（14磅），緊接還有十隻金沙大蠔、豉汁蒸盤龍鱔（3.5磅）等十道菜，盛惠加幣$599……只不過隨便一款套餐，平、靚、正到問你點算？

加上最近加幣笨豬跳，以上價錢頂籠香港四季酒店三星餐廳中午飲茶二人前。用以宴請來自遠方家鄉親友，真係睇得又食得。尤其那個龍蝦山，圖示我們這一道菜只用上半隻龍蝦，已經小山一個，鄰桌那碟做了一整尾龍蝦盡堆，那個龍蝦山兩名侍者抬轎般抬出……如果即場向女友求緍，起碼準外母流着口水不停點頭。

寶號：魚樂軒 Fishman Lobster Clubhouse Restaurant

地點：多倫多Markham Steeles Ave E.

（本欄逢周三至五刊登）